Bach Collegium Japan (BCJ) 1990. urtean sortu zuen Masaaki Suzukik, obraren musika-zuzendariak, Japoniako publikoari Barrokoaren maisulanen garaiko instrumentuekin interpretazioak aurkezteko asmoarekin. Taldearen izenak erakusten duen moduan, xede nagusia da Johann Sebastian Bach-en eta Buxtehude, Schütz, Schein eta Böhm bezalako haren inguruko konpositore alemaniarren lanak erakustea.

BCJ orkestra barrokoak eta koroak osatzen dute. Jarduera nagusien artean aurkitzen dira Bach-en Kantaten urteko zikloa eta programa instrumental ugari.

Masaaki Suzuki zuzendariak aparteko ospea lortu du organo eta klabezinaren solista gisa nahiz Europako solista eta talde entzutetsuenen zuzendari bezala.

Ikuskizuna gure eskenatokira iritsiko da Bilbao 700 Fundazioaren eta Arriaga Antzokiaren artean sinatutako lankidetza-hitzarmenari esker.